कपिलेश्वर मंगल कार्यालयात राष्ट्रवादीचा भव्य मेळावा; खासदार डॉ. निलेश लंके यांचा विकासासह ‘लाडक्या बहिणी’ंसाठी रोजगाराचा नवा संकल्प

कपिलेश्वर मंगल कार्यालयात राष्ट्रवादीचा भव्य मेळावा; खासदार डॉ. निलेश लंके यांचा विकासासह ‘लाडक्या बहिणी’ंसाठी रोजगाराचा नवा संकल्प
निघोज – दिनांक 25 एप्रिल पत्रकार ( योगेश खाडे)
आगामी जिल्हा परिषद, पंचायत समिती व ग्रामपंचायत निवडणुकांच्या पार्श्वभूमीवर निघोज-अळकुटी जिल्हा परिषद गटातील राष्ट्रवादी काँग्रेस पार्टी (शरदचंद्र पवार साहेब गट) यांची आढावा बैठक व कार्यकर्ता मेळावा निघोज येथील कपिलेश्वर मंगल कार्यालयात उत्साहात पार पडला. या मेळाव्यास लोकनेते खासदार डॉ. निलेशजी लंके यांची प्रमुख उपस्थिती लाभली.
खासदार लंके यांनी कार्यकर्त्यांशी थेट संवाद साधत संघटन बळकट करण्यावर भर दिला. “कार्यकर्ते हेच पक्षाचे बळ असून त्यांना दिलेला शब्द आम्ही पाळणारच,” असा विश्वास त्यांनी व्यक्त केला.
मुख्य मुद्दे :
उत्स्फूर्त प्रतिसाद :
कपिलेश्वर मंगल कार्यालयात पार पडलेल्या या मेळाव्यास गटातील पदाधिकारी, कार्यकर्ते व नागरिकांची मोठी उपस्थिती.
पक्षप्रवेशाने वाढली ताकद :
निघोजचे माजी उपसरपंच उमेश सोनवणे यांनी राष्ट्रवादी काँग्रेस (शरद पवार गट) मध्ये प्रवेश करून पक्षाला बळकटी दिली.
पदाधिकाऱ्यांची निवड :
गटातील विविध पदांवर पदाधिकाऱ्यांची निवड करून संघटन अधिक मजबूत करण्यात आले.
विकासकामांचा आढावा :
परिसरात पूर्ण झालेल्या विकासकामांचा आढावा घेण्यात आला.
प्रलंबित कामे पूर्ण करण्याचा शब्द :
राहिलेली सर्व विकासकामे लवकर पूर्ण करण्याचे आश्वासन खासदार लंके यांनी दिले.
‘लाडक्या बहिणी’ंसाठी रोजगाराचा नवा आराखडा :
महिलांच्या आर्थिक सक्षमीकरणासाठी खासदार लंके यांनी महत्त्वपूर्ण योजना जाहीर केली. गृह उद्योगाच्या माध्यमातून ‘लाडक्या बहिणी’ंना दरमहा सुमारे ३० ते ३५ हजार रुपये उत्पन्न मिळेल, असे नियोजन करण्यात येणार असल्याचे त्यांनी सांगितले. महिलांनी तयार केलेला माल थेट कंपनीशी जोडून त्याची विक्री केली जाईल, ज्यामुळे महिलांना स्थिर व हमखास उत्पन्नाचा मार्ग उपलब्ध होणार असल्याचे त्यांनी स्पष्ट केले.
मान्यवरांची उपस्थिती :
या बैठकीस कृषी उत्पन्न बाजार समितीचे सभापती गंगाराम बेलकर, दिपक अण्णा लंके, सुदाम पवार, बाबासाहेब कवाद, निघोज नागरी पतसंस्थेचे अध्यक्ष वसंतराव कवाद सर, उपाध्यक्ष नामदेव मामा थोरात, भिवाशेठ रसाळ, शिवाजीराव वराळ, माजी सरपंच ठकाराम लंके, मच्छिंद्र शेठ लंके, बाळासाहेब पुंडे, शिरापूरचे माजी सरपंच गुंडाभोसले, सुरेश ढवण, मळगंगा ग्रामीण विकास ट्रस्टचे सचिव शांताराम कळसकर साहेब, सहसचिव विश्वासराव शेटे, बाळासाहेब लंके, ग्रुप ग्रामपंचायत सदस्य दिगंबर लाळगे, शंकर गुंड, महेंद्रकुमार शेटे तसेच सर्व पदाधिकारी व कार्यकर्ते मोठ्या संख्येने उपस्थित होते.
खासदार लंके यांचे प्रतिपादन :
“जनतेच्या विश्वासावर आम्ही विकासाची वाटचाल सुरू ठेवली आहे. झालेली कामे हीच आमची ओळख आहे. उर्वरित कामेही पूर्ण करूच; त्याचबरोबर महिलांना स्वावलंबी करण्यासाठी ठोस पावले उचलणार,” असे ठाम प्रतिपादन खासदार डॉ. निलेश लंके यांनी केले.
निवडणुकांची रणधुमाळी सुरू :
आगामी निवडणुकांच्या पार्श्वभूमीवर कार्यकर्त्यांनी गावपातळीवर संपर्क वाढवून पक्षाची धोरणे जनतेपर्यंत पोहोचवावीत, तसेच स्थानिक प्रश्न सोडवण्यासाठी पुढाकार घ्यावा, असे आवाहन करण्यात आले.
कपिलेश्वर मंगल कार्यालयात पार पडलेल्या या मेळाव्यामुळे निघोज-अळकुटी गटात राष्ट्रवादी काँग्रेस पक्षाच्या संघटनात्मक हालचालींना मोठा वेग मिळाला असून विकासाबरोबरच रोजगारनिर्मितीचा मुद्दा केंद्रस्थानी आल्याने आगामी निवडणुकांसाठी वातावरण अधिकच रंगू लागले आहे.