Updated by स्टार वन न्युज मराठी ™
29 जानेवारी 2026
📍अहिल्यानगर @अकोले 
जनसेवा फाऊंडेशन, लोणी बुद्रुक संचलित कला, वाणिज्य व विज्ञान महाविद्यालय, शेंडी (चिचोंडी) येथे दिनांक 26 जानेवारी 2026 रोजी 77 वा प्रजासत्ताक दिन अत्यंत उत्साहपूर्ण व राष्ट्रभक्तीमय वातावरणात साजरा करण्यात आला. या कार्यक्रमाचे अध्यक्षस्थान महाविद्यालयाचे प्राचार्य डॉ. प्रभाकर डोंगरे यांनी भूषविले होते. महाविद्यालय विकास समितीचे सदस्य श्री. राजाराम वाकचौरे यांच्या हस्ते ध्वजारोहण करण्यात आले.
कार्यक्रमास गावातील ज्येष्ठ नागरिक व सामाजिक कार्यकर्ते श्री. सुरेश गभाले, श्री. विठ्ठल गभाले, माजी सरपंच श्री. राजू मधे, श्री. तेजस कोठवळ, श्री. दगडू वाघमारे तसेच स्टार न्यूजचे संपादक श्री. सचिन रेवगडे हे प्रमुख पाहुणे म्हणून उपस्थित होते. उपस्थित मान्यवरांच्या साक्षीने राष्ट्रध्वजाला मानवंदना देण्यात आली व राष्ट्रगीताचे सामूहिक गायन करण्यात आले.
यावेळी चिचोंडी गावचे माजी सरपंच यांनी विद्यार्थ्यांना प्रजासत्ताक दिनाचे महत्त्व सांगताना भारतीय संविधान हे देशाच्या लोकशाही व्यवस्थेचे आधारस्तंभ असल्याचे स्पष्ट केले. स्वातंत्र्य, समता, बंधुता व न्याय या मूल्यांवर भारताची लोकशाही उभी असून विद्यार्थ्यांनी ही मूल्ये आपल्या जीवनात आत्मसात करून जबाबदार नागरिक बनावे, असे मार्गदर्शन त्यांनी केले.
✍️राष्ट्रीय सेवा योजना अधिकारी प्रा. नामदेव बांगर यांनी आपल्या मनोगतातून विद्यार्थ्यांमध्ये राष्ट्रसेवा व समाजसेवेची भावना वृद्धिंगत होणे गरजेचे असल्याचे सांगितले. “राष्ट्रीय सेवा योजना ही विद्यार्थ्यांना समाजाशी जोडणारी महत्त्वाची चळवळ असून,
स्वच्छता, पर्यावरण संवर्धन, सामाजिक सलोखा आणि गरजू घटकांसाठी सेवा करणे हीच खरी देशभक्ती आहे,” असे त्यांनी नमूद केले.
महाविद्यालय विकास समिती सदस्य श्री. राजाराम वाकचौरे यांनी आपल्या मनोगतातून महाविद्यालयाची सामाजिक जबाबदारी अधोरेखित केली.
“महाविद्यालय हे केवळ शिक्षण देणारे केंद्र नसून, सुसंस्कृत, कर्तव्यदक्ष व राष्ट्रभक्त नागरिक घडविण्याचे कार्य करते. विद्यार्थ्यांनी संविधानाच्या मूल्यांचा सन्मान राखून राष्ट्राच्या प्रगतीसाठी योगदान द्यावे,” असे त्यांनी सांगितले.
याप्रसंगी प्रा. अनिल डगळे यांनी विद्यार्थ्यांना, उपस्थित सर्व मान्यवरांना तसेच महाविद्यालयातील सर्व प्राध्यापक व शिक्षकेतर कर्मचाऱ्यांना भारतीय संविधानाची शपथ दिली. संविधानाच्या मूल्यांचे पालन करणे, देशाची एकता व अखंडता जपणे आणि कर्तव्यनिष्ठ नागरिक म्हणून वर्तन करणे याबाबतची ही शपथ कार्यक्रमातील महत्त्वाचा व प्रेरणादायी क्षण ठरली.
अध्यक्षीय भाषणात प्राचार्य डॉ. प्रभाकर डोंगरे यांनी 26 जानेवारीचे ऐतिहासिक महत्त्व विशद करताना सांगितले की, “1950 साली भारताने स्वतःचे संविधान स्वीकारून सार्वभौम, समाजवादी, धर्मनिरपेक्ष व लोकशाही प्रजासत्ताक म्हणून स्वतःची ओळख निर्माण केली.
काही विद्यार्थ्यांनी आपले मनोगत व्यक्त केले
आजच्या तरुण पिढीने संविधानातील मूल्ये जपून शिक्षण, शिस्त व सेवाभाव यांच्या माध्यमातून देशाच्या उन्नतीसाठी योगदान द्यावे,” असे त्यांनी प्रतिपादन केले.
कार्यक्रमाच्या शेवटी प्रा. जनार्दन वाघ यांनी उपस्थित सर्व मान्यवर, प्राध्यापक, कर्मचारी व विद्यार्थ्यांचे आभार मानले. कार्यक्रमाचे सूत्रसंचालन प्रा. अनिल डगळे यांनी अत्यंत प्रभावी व शिस्तबद्ध पद्धतीने केले. संपूर्ण कार्यक्रमाचे आयोजन महाविद्यालयातील सर्व प्राध्यापक व शिक्षकेतर कर्मचाऱ्यांनी सामूहिक प्रयत्नांतून यशस्वीरीत्या केले.
हा 77 वा प्रजासत्ताक दिन सोहळा विद्यार्थ्यांमध्ये देशभक्ती, संविधानप्रेम व सामाजिक बांधिलकीची भावना निर्माण करणारा ठरला. कार्यक्रमामुळे महाविद्यालय परिसरात राष्ट्रप्रेम, अभिमान व उत्साहाचे वातावरण निर्माण झाले असून, सर्व उपस्थितांना एक जबाबदार भारतीय नागरिक म्हणून कर्तव्यपालनाची प्रेरणा मिळाली.
आभार प्रा जनार्दन वाघ सर यांनी मानले
फोटो गॅलरी 👇
