👉ठाण्यातील केंद्रीय विद्यालयात आता मराठीचे धडे, मनसेच्या मागणीनंतर विद्यालयाचा निर्णय⭐ प्रतिनिधी ✍️ दुर्गेश र. गायकवाड

ठाणे : ठाण्यातील कोलशेत येथील केंद्रीय विद्यालयात मराठी भाषा शिकवण्याचा निर्णय घेण्यात आला असून यामुळे या शाळेत आता मराठीचे धडे विद्यार्थी गिरविणार आहेत.

या संदर्भात मनसेकडून पाठपुरावा सुरु होता, त्यास यश आल्यानंतर राज्यातील केंद्रीय विद्यालयाच्या ६९ शाळांमध्ये ठाणे पॅटर्न राबविण्याची मागणी मनसेने केली आहे.

ठाण्यातील कोलशेत येथील केंद्रीय विद्यालयात १४०० विद्यार्थी शिक्षण घेत आहेत.

हिंदी आणि इंग्रजी या दोनच भाषांमध्ये शिक्षण दिले जात होते.

गेल्या अनेक वर्षांपासून या शाळेत मराठी शिकवली जात नव्हती.

याबाबत मनविसेचे सरचिटणीस संदीप पाचंगे यांनी शिक्षणाधिकाऱ्यांकडे तक्रार केली होती.

या शाळेत मराठी भाषेचा समावेश करण्यात यावा, अशी मागणी त्यांनी केली होती.

या पाठपुराव्याला अखेर यश आले असून, २६ जून २०२५ रोजी केंद्रीय विद्यालयाच्या मुख्याध्यापकांनी शिक्षणाधिकाऱ्यांना दिलेल्या पत्रात मराठी शिकवण्यास सहमती दर्शवली आहे.

‘नवीन शैक्षणिक धोरणानुसार मराठी भाषा ही स्थानिक भाषा म्हणून शिकवणे आवश्यक असून, आमच्या शाळेत सुद्धा याची अंमलबजावणी होईल असे मुख्याध्यापकांनी लेखी कळवले आहे.