एम.डी. ड्रग्स प्रकरण : तपास थांबला की थांबवला? मुख्य आरोपी सापडूनही कारवाई नाही — सेटलमेंटचा संशय, राजकीय दबावाची कुजबुज✍️ पत्रकार ·योगेश खाडे

अहिल्यानगर | दिनांक 3 फेब्रुवारी | पत्रकार : योगेश खाडे
Updated by –स्टार वन न्युज मराठी ™ 
अहिल्यानगर जिल्ह्यातील कुप्रसिद्ध एम.डी. ड्रग्स प्रकरण आता केवळ गुन्हा न राहता तपास यंत्रणेच्या कार्यपद्धतीवर प्रश्नचिन्ह उभे करणारे प्रकरण ठरत आहे. या प्रकरणातील मुख्य आरोपी शामसुंदर गुजर व त्याचे काही साथीदार सापडल्याची माहिती समोर येत असतानाच, पोलिसांनी सुरू केलेले शोधकार्य अचानक गुंडाळले गेले—आणि इथूनच संशयाचे वादळ उठले आहे.
  ✍️आरोपी सापडले असतील तर अटक का नाही?
सापडले नसतील तर शोधमोहीम मध्येच बंद का?
हे प्रश्न केवळ सामान्य नागरिकांचे नाहीत, तर कायदा व सुव्यवस्थेवर विश्वास ठेवणाऱ्या प्रत्येकाचे आहेत.
विश्वसनीय सूत्रांच्या माहितीनुसार, काही ठिकाणी आरोपींच्या हालचालींचे ठोस संकेत पोलिसांना मिळाले होते. मात्र त्यानंतर तपासाचा वेग अचानक कमी झाला आणि काही वेळातच शोधकार्य थांबवण्यात आल्याचे चित्र दिसून आले. यामुळे “प्रकरण दाबण्यासाठी सेटलमेंट झाली का?” अशी तीव्र चर्चा सुरू झाली आहे.
याहून गंभीर बाब म्हणजे, शोधकार्य कुणाच्या आदेशाने थांबवले गेले?
राजकीय हस्तक्षेप झाला का?
वरच्या पातळीवरून ‘हात आखडता घेण्याच्या’ सूचना आल्या का?
हे प्रश्न प्रशासनासाठी अस्वस्थ करणारे आहेत.
एम.डी. ड्रग्ससारखा घातक अंमली पदार्थ तरुण पिढीचे भविष्य उद्ध्वस्त करत असताना, अशा प्रकरणात ढिलाई, गुप्तता आणि मौन हे अधिक धोकादायक ठरते. जर कायदा खरोखरच सर्वांसाठी समान असेल, तर मुख्य आरोपींना अभय का?
जप्ती, अटक आणि साखळी उघडकीस आणण्याची प्रक्रिया का थांबली?
आज नागरिकांच्या मनात एकच प्रश्न घोळतो आहे —
या प्रकरणात कायदा चालतोय की ताकद?
पोलीस तपास थांबला की थांबवला गेला?
या संपूर्ण प्रकरणावर पोलीस प्रशासनाने तात्काळ आणि स्पष्ट खुलासा करणे अत्यावश्यक आहे. अन्यथा, ड्रग्स माफिया बळकट आणि यंत्रणा हतबल असा संदेश समाजात रुजण्याची भीती नाकारता येत नाही.
सत्य बाहेर येणार की प्रकरण कायमचे ‘शांत’ केले जाणार? — याकडे आता संपूर्ण जिल्ह्याचे लक्ष लागले आहे.