👉 पत्रकार-विद्यार्थी संवादातून प्रेरणा; गुरुपौर्णिमेनिमित्त विद्यार्थ्यांनी जाणलं पत्रकारितेचं खरं महत्व ⭐ प्रतिनिधी ✍️ दुर्गेश र. गायकवाड

‎रविवार, दि. २० जुलै २०२५

नसरापूर : गुरुपौर्णिमेनिमित्त विजयराव मुकुंद आठवले माध्यमिक विद्यालयात आयोजित “पत्रकारिता म्हणजे काय?” या मार्गदर्शन कार्यक्रमात पत्रकार क्षेत्रातील मान्यवरांनी विद्यार्थ्यांना पत्रकारितेचे महत्त्व, संधी, जबाबदाऱ्या आणि समाजातील भूमिका सांगत त्यांना प्रेरणा दिली.

कार्यक्रमाची सुरुवात छत्रपती शिवाजी महाराज व पत्रकारितेचे आद्यपुरुष बाळशास्त्री जांभेकर यांना अभिवादन करून झाली. अध्यक्षस्थानी ज्ञानप्रकाश शिक्षण संस्थेचे अध्यक्ष शाम मनोहर दलाल होते. प्रमुख पाहुणे म्हणून भोर तालुका पत्रकार कृती समितीचे अध्यक्ष माणिक पवार, ज्येष्ठ पत्रकार वैभव भुतकर, पत्रकार तुषार सणस व विशाल शिंदे उपस्थित होते.

शाम दलाल यांनी विद्यार्थ्यांना सांगितले, “मी शाळेत असताना आवडलेल्या बातम्यांचे कात्रण काढून ठेवत असे. आजही माझा तो छंद टिकून आहे. त्यामुळे मुलांनी वृत्तपत्र वाचायची सवय लावावी. शिक्षकांनीही शाळेत बातम्या लिहायला शिकवले पाहिजे. पेपर वाचल्याने माहितीचा दृष्टीकोन विस्तारतो आणि विचार करायला शिकतो,” असे त्यांनी सांगितले.

माणिक पवार म्हणाले, “वृत्तपत्र व मीडियामधून जागतिक स्तरापासून स्थानिक घटना समाजाला कळतात. योग्य वृत्तांकन करून समाजाला दिशा देण्यासाठी नव्या पिढीने पत्रकारितेत यावे. जिद्द ठेवल्यास यश हमखास मिळते,” असे आवाहन केले.

वैभव भुतकर यांनी वर्तमानपत्रांची मूलभूत तत्वे व आजच्या पत्रकारितेची गरज पटवून दिली. तुषार सणस व विशाल शिंदे यांनी इलेक्ट्रॉनिक मीडियाचा प्रभाव आणि जबाबदाऱ्या स्पष्ट केल्या. विशाल शिंदे म्हणाले, “आजचा काळ हा इलेक्ट्रॉनिक मीडियाचा आहे. मोबाईल, सोशल मीडियाच्या साहाय्याने बातम्या क्षणार्धात पोहोचवता येतात. मात्र, सत्यतेची खात्री करून जबाबदारीने बातम्या प्रसारित करायला हव्यात.

तरुणांनी या तंत्रज्ञानाचा योग्य वापर करून समाजातील समस्या उजेडात आणाव्यात,” असे त्यांनी सांगितले.

कार्यक्रमात एका विद्यार्थिनीने पत्रकारांना प्रश्न विचारला, “ज्या बातम्या मारामारीच्या किंवा अपघाताच्या असतात, त्या आतल्या पानांवर द्याव्यात आणि पुढच्या पानांवर चांगल्या, प्रेरणादायी बातम्या असाव्यात,” अशी तिची मते मांडली. विद्यार्थ्यांनीही प्रश्न विचारून मान्यवरांशी संवाद साधला.

कार्यक्रमात उपस्थित मान्यवरांमध्ये मुख्याध्यापिका सौ. रेवती पवार, संचालक श्री विक्रम कदम, श्री गणेश पालकर, शिक्षक श्री शेटे सर, सौ. भोरडे मॅडम, सौ. कांबळे मॅडम यांचा समावेश होता. कार्यक्रमाचे सूत्रसंचालन श्री गणेश सोनवणे सर यांनी केले. विद्यार्थ्यांनी पत्रकार बांधवांशी केलेल्या या संवादातून पत्रकारितेचे महत्त्व, जबाबदाऱ्या आणि समाजाला दिशा देणाऱ्या चांगल्या बातम्यांचे मोल समजून घेतले.